Алтернатива за Германија (AfD), со која главните партии во Германија официјално одбиваат да соработуваат поради своите радикални ставови, победи во вториот круг од локалните избори во областа Зонеберг во источната германска покраина Тирингија, освојувајќи 52,8 отсто од гласовите.
Тоа е последниот успех на партијата чија поддршка расте по јавното незадоволство од социјалдемократскиот канцелар Олаф Шолц и неговата коалиција со Зелените и Либерално-демократската партија (ФДП), која се соочува со внатрешни спорови околу политиките и буџетите.
AfD, која според анкетите ужива поддршка од меѓу 19 и 20 отсто од гласачите, ги искористува стравувањата на гласачите за рецесија, миграција и зелена транзиција, велат аналитичарите и има намера да номинира свој кандидат за канцелар на сојузните избори во 2025 година.
Партијата е особено силна на територијата на поранешната комунистичка Источна Германија, а анкетите покажуваат дека следната година би можела да постигне победа во три источни сојузни држави.
Јасната победа на Роберт Шеселман од АfD во областа со само околу 56.000 жители испраќа порака до Берлин, велат аналитичарите, особено откако сите други партии во Зонеберг се обединија против него.
Шеселман се соочи со конзервативен кандидат во вториот круг по изборите одржани пред две недели. Конзервативниот кандидат во неделата освои 47,2 отсто од гласовите.
Додека екстремно десничарските партии се зајакнаа низ Европа, подемот на АfD е особено деликатно прашање поради нацистичкото минато на Германија. Партијата се противи на економските санкции против Москва поради војната во Украина и оспорува дека човечката активност е причина за климатските промени.
Германската разузнавачка служба овој месец објави дека екстремно десничарскиот екстремизам е најголемата закана за демократијата во Германија и ги предупреди гласачите да не ја поддржуваат АfD.
Партијата е основана пред десет години како антиевропска партија. Нејзината популарност порасна по мигрантската криза во 2015 година, а влезе во германскиот парламент во 2017 година, со што стана официјална опозиција.