Соединетите Американски Држави во четвртокот санкционираа повеќе од 120 руски и киргистански компании за помагање на руската агресија врз Украина.
Мерките конкретно го таргетираат пристапот на Русија до санкционирани материјали како што се електронските компоненти кои можат да се користат за воени цели, рече американскиот државен секретар Антони Блинкен.
„Овие санкции ќе ја спречат Русија да пристапи до критичните материјали, нејзините идни енергетски капацитети за производство и извоз, ќе ја ограничат нејзината употреба на меѓународниот финансиски систем и ќе ги спречат оние кои се вклучени во заобиколувањето на санкциите“, рече тој.
Меѓу санкционираните се руски банки, енергетски, поморски и технолошки компании, производители на оружје и седум руски истражувачки институти.
На мета се и неколку киргистански компании за кои САД тврдат дека и помагаат на Русија да ги заобиколи санкциите. Еден од нив, RM Design and Development, испорачуваше полупроводници и интегрирани кола за руските клиенти кои потоа ја снабдуваа одбранбената индустрија, пишува агенцијата France Presse.
Киргистан во четвртокот негираше дека и помогнал на Москва да ги заобиколи западните санкции наметнати по инвазијата на Украина, но ја призна „можната“ вмешаност на приватни компании.
Американските санкции забрануваат какви било трансакции со овие компании и го ограничуваат нивниот пристап до меѓународни финансии.