Експлозија го потресе во петокот центарот на рускиот град Таганрог во близина на границата со Украина, при што беа повредени неколку лица, соопшти Кремљ.
На друго место, истакнатиот руски пратеник Александар Кинштајн во објава на Телеграм рече дека експлозија погоди голема нафтена рафинерија во руската област Самара, околу 1.350 километри северозападно од Таганрог.
Обвинувајќи ја Украина за „терористички напад врз станбена инфраструктура“ во Таганрог, руското Министерство за одбрана во објава на Телеграм објави дека нејзините одбранбени системи „откриле и пресретнале“ модифицирана „ракетна С-200 од советско производство“.
Се додава дека делови од проектилот паднале врз градот, при што се оштетени неколку згради и се повредени цивили, според NBC.
Министерството не соопшти колку лица се повредени, но регионалниот гувернер на Ростов, Василиј Голубев, во објава на својата Телеграм сметка изјави дека 15 лица се здобиле со полесни повреди од шрапнелите од експлозивната направа. Никој не загинал, додаде тој.
Во подоцнежна објава на Телеграм, тој го намали бројот на повредени на 12, но рече дека 9 лица се хоспитализирани. Една од жртвите претрпе „трауматска повреда на мозокот“ и беше оперирана, додаде тој.
Прелиминарните информации сугерираат дека експлозијата во Самара била предизвикана од експлозивна направа, рече Кинштајн, додавајќи дека нема повредени, а штетата не е сериозна.
Безбедносните служби го уапсија лицето кое го обвинуваат за експлозиите во рафинеријата при обидот да ја напушти Русија, рече тој. Опишувајќи го осомничениот како „вработен“ во рафинеријата, Кинштајн додаде дека тој претходно „се преселил во Русија од Украина“.
Засега нема индикации дека двата инциденти се поврзани.
Претходно во петокот, украинско беспилотно летало беше соборено пред Москва, се вели во соопштението на руското Министерство за одбрана. Ова беше трет напад или обид со беспилотни летала врз главниот град овој месец.
Министерството соопшти дека во инцидентот во раните утрински часови нема повредени или материјална штета. Точната локација на која е соборен дронот не е наведена.
Две беспилотни летала ја погодија руската престолнина во понеделникот, при што едното слета во центарот на градот во близина на седиштето на Министерството за одбрана покрај реката Москва на околу 5 километри од Кремљ. Уште едно беспилотно летало удрило во деловна зграда во јужниот дел на Москва, при што биле уништени неколку горни катови.