Македонски државјанин крадел предмети од кинеска фирма во Србија

Припадници на српското Министерство за внатрешни работи во градот Бор уапсиле македонски државјанин со иницијали Н.Г., роден во 1973 година, бидејќи постојат основи на сомнение дека извршил тешка кражба.

Лицето е обвинето дека упаднало во магацин на кинеска компанија и украло околу 400 килограми високонапонски кабел, 134 килограми бакарен кабел, 79 килограми бронзени делови за работни машини и други предмети.

Полицијата ги пронашла украдените предмети и му ги вратила на сопственикот.

-По наредба на Основното јавно обвинителство Бор, на осомничениот му е одредена мерка притвор во траење до 48 часа и со кривична пријава ќе биде изведен пред судија, информираат од српското МВР.