Британската влада, пред проценката на состојбата со јавните финансии во понеделник, објави дека земјата е „шворц и скршена“.
Ова го пренесува Ројтерс и додава дека новоизбраната Лабуристичка партија ќе го искористи извештајот за да ги обвини своите претходници за дефицитот од 20 милијарди фунти (23,6 милијарди евра).
Избрани да ја предводат шестата по големина светска економија со убедлива победа на изборите на 4 јули, лабуристите го поминаа најголемиот дел од трите недели на власт објаснувајќи ѝ на јавноста дека ситуацијата е полоша отколку што се мислеше во речиси секоја област од јавната политика, пишува „Јутарњи лист“.
Министерката за финансии Рејчел Ривс ќе ги претстави резултатите од фискалниот преглед пред парламентот и ќе ја обвини Конзервативната партија, која ја водеше земјата во изминатите 14 години, дека троши пари на ветувања што не може да се финансираат во обид да обезбеди јавна поддршка и дека земјата останала „без пари“.
Проценката ќе покаже дека Британија е и „шворц и скршена“, откривајќи го нередот што популистичката политика го направи со економијата и јавните услуги – соопшти кабинетот на премиерот Кир Стармер.
Ќе покаже, се додава, и дека претходната влада презела некои финансиски обврски за оваа фискална година без да праша од каде ќе дојдат парите.
Конзервативците ги отфрлаат обвинувањата на лабуристите за „црна дупка“ во јавните финансии како измислен изговор за зголемување на даноците и истакнуваат дека тие не кажале ниту збор за тоа за време на изборната кампања.
И некои економски експерти изразуваат скептицизам и тврдат дека има многу малку големи изненадувања што лабуристите не можеа да ги предвидат пред да ја преземат власта.
Се очекува Ривс да се согласи на покачувања за наставниците и здравствените работници.
Тој е и под притисок да ги исполни изборните ветувања и да не ги зголемува даноците на доход, данокот на додадена вредност и данокот на добивка.