Според белградските медиуми, момчето убиец Коста К. се согласило да сведочи во постапката против неговите родители. Со оглед на тоа дека решил да зборува за масакрот што го направил, ќе мора да одговори апсолутно на секое прашање што ќе му биде поставено – од судијата, обвинителот, семејствата на жртвите, но и неговите родители, пренесува Блиц.
Малолетниот убиец од белградското основно училиште, Владислав Рибникар, кој на 3 мај минатата година уби девет ученици и еден обезбедувач, во вторникот за прв пат по масакрот дојде во Специјалниот суд во Белград, пред кој има полицајци вооружени со пушки, пишува Блиц. Момчето ќе биде специјален сведок на судењето на неговите родители.
Тој бил донесен со возило на брза помош во придружба на полициски автомобили од детската психијатриска установа во која се наоѓа од масакрот.
На насобраните новинари кратко им се обрати адвокатот Огњен Божовиќ.
– Денеска се очекува сослушувањето на малолетниот убиец. Тој има право да одбие да сведочи, имајќи предвид дека веќе е сослушан. Ова е прва можност семејствата на убиените да поставуваат прашања што ги мачат веќе една година – рече тој.
Во Специјалниот суд први пристигнаа родителите на Адријана Дукиќ.
Миљана Кецмановиќ, мајката на убиецот, на судењето дојде во придружба на своите бранители. Таа денеска ќе го види својот син за прв пат по една година – имено, и е забрането да комуницира со момчето за да не влијае на неговото сведочење.
Дури на рочиштето во вторник треба да се одлучи како ќе сведочи момчето убиец – дали ќе дојде на говорница или ќе биде сослушан од посебна просторија.
Родителите ќе бидат зад стаклото, а грбот ќе им биде свртен.
Специјалниот суд во Белград води кривична постапка против Миљана и Владимир Кецмановиќ, а малолетниот убиец нема да одговара пред суд за делата што ги направил на само 13 години.
Владимир Кецмановиќ е обвинет за тешко кривично дело против општата безбедност, со оглед на тоа што синот го однел на стрелиште и го научил да пука, а не го заштитил соодветно оружјето што го имале во куќата.
Мајката се товари за кривично дело недозволено поседување оружје, а нејзината ДНК е пронајдена на една од чаурите во училницата во училиштето како и на вратоврската за коса со која било врзано шишето во кое убиецот го направил молотовиот коктел.