Од ДУИ упатија критки за предложениот Закон за измени во средното образование бидејќи, како што велат, наметнува моноетнички решенија и му штети на меѓуетничкиот соживот. Замерките се поради предлогот да се интонира македонската химна во средните училишта.
-Демократската унија за интеграција најостро го осудува изгласувањето на првата фаза од предложениот закон за измени во средното образование, со кој се наметнуваат моноетнички решенија и се нарушува духот на меѓуетничкиот соживот. Овој закон е чекор наназад и неприфатлив за мултиетничка држава како С.Македонија, наведуваат од опозициската партија.
Според нив, уште посрамно е однесувањето на коалицијата ВЛЕН.
-Со негласањето тие молчеа и практично му дадоа поддршка на овој закон. Помеѓу стравот од гневот на народот што толку многу го потцениле и стравот на нивните покровители на ВМРО-ДПМНЕ, тие останаа парализирани. ДУИ ги поддржува акциите на Европскиот Фронт за блокирање на овој закон. Албанците не можат да прифатат одлуки кои ги игнорираат. Решението мора да биде сеопфатно и праведно за сите, се вели во соопштението на ДУИ.
Пред два дена министерката Весна Јаневска истакна дека во моментов ништо друго не се дискутира, освен химната, што, вели дека не е предмет за дискусија.
-Оттука можам да кажам дека е комплимент за Министерството што не е најдена друга маана, но, мислам дека е крајно неразумно да се запре законот кој не е менуван повеќе од 20 години и да не можат да се имплементираат новините кои државата ги очекува. Денес е законот на дневен ред на собраниска седница. Се надевам дека пратениците на ДУИ ќе најдат сили и да ја надминат за нив, политичката вредност кој не е вредност и ќе соберат да го изгласаат законот по второто читање, кажа министерката запрашана дали очекува дополнително да се пролонгира законот за средно образование, со оглед на најавените амандмани од ДУИ.
На почетокот и на крајот од учебната година, при завршувањето на средното образование, при одбележување на патронатот, како и при други прослави, треба да се интонира државната химна. Ова го предвидува новиот Закон за средно образование. Јаневска претходно истакна дека интонирањето на химната не е задолжително. За пуштање на химната ќе одлучуваат институциите под чија капа се училиштата, односно општините и Град Скопје.