Сообраќајна незгода се случила синоќа на еден од главните булевари во главниот град. Комбе и автомобил мерцедес се судриле на раскрсницата меѓу булеварот „Климент Охридски“ и улицата „Димитрие Чуповски“ во центарот на Скопје.
Раскрсницата каде што се случила несреќата е во близина на студентскиот дом „Кузман Јосифовски – Питу“.
Од МВР излегоа со детали за сообраќајката. Три лица завршиле во болница.
-Вчеравечер околу 21.55 часот во СВР Скопје било пријавено дека на крстосница од булевар „Св. Климент Охридски“, ул. „Митрополит Теодосиј Гологанов“ и ул. „Димитрие Чуповски“ во Скопје се случила сообраќајна незгода помеѓу товарно возило „пежо боксер“ со скопски регистарски ознаки, управувано од Н.Е.(59) од Скопје и патничко возило „мерцедес“ со скопски регистарски ознаки, управувано од Д.И.(47) од село Волково, скопско.
Во незгодата со телесни повреди се здобиле двајцата возачи и уште една сопатничка од возилото „пежо боксер“ Ф.Е.(46) од Скопје, констатирани во Градската општа болница „Св. Наум Охридски“ и Комплексот клиники „Мајка Тереза“, известија од полицијата.
Извршен бил увид од увидна екипа од СВР Скопје, соопштија од Скопската полиција.