Српскиот претседател Александар Вучиќ најави дека руски експерти во петок ќе пристигнат во Србија за да ги продолжат разговорите со нив за Нафтената индустрија на Србија (НИС), на која САД ѝ воведе санкции поради руската сопственост.
Вучиќ синоќа изјави дека им рекол на Русите дека треба да предложат решение за НИС и дека единственото нешто што нема да дозволи е Србија да остане без нафтени деривати и дека рафинеријата во Панчево мора да работи и да има резервни делови.
Како што истакна, тоа е услов за исполнување на целта Србија да стане најбрзо растечка земја во Европа.
Вучиќ рече дека го знае ставот на Русите за нивната сопственост во НИС по воведувањето санкции против компанијата, но дека не сака јавно да го коментира.
Тој повтори дека Србија нема да ја национализира НИС и да одзема имот од Русите или од кој било друг.
Тој исто така најави дека во четврток попладне ќе разговара за санкциите против НИС со претставници на Канцеларијата за контрола на странски средства (OFAC) во Министерството за финансии на САД, од кои очекува повеќе информации, но дека верува дека и понатаму ќе остане некоја „сива зона“.
„Ќе се обидам да разговарам со новата американска администрација“, рекол Вучиќ, додавајќи дека „не треба да се надеваат премногу бидејќи санкциите против НИС се лукаво креирани“.