Американскиот претседател Доналд Трамп во средата го номинираше Ендрју Пуздер, поранешниот извршен директор на компаниите за брза храна Hardee’s and Carl’s Jr., за амбасадор на САД во ЕУ, додека агентот кој беше присутен за време на обидот за атентат врз него во Пенсилванија во јули беше именуван за шеф на Тајната служба.
„Енди е адвокат, бизнисмен, економски коментатор и автор на бестселери“, напиша Доналд Трамп на својата платформа „Truth Social“.
– Во 2000 година беше назначен за извршен директор на CKE Restaurants, матичната компанија на меѓународниот ланец ресторани за брза храна Carl’s Jr and Hardee’s. За време на неговите 17 години на чело, Енди ја извлече компанијата од тешката финансиска ситуација и ѝ овозможи да опстане“, додаде Трамп.
Според него, „Енди ќе заврши одлична работа застапувајќи ги интересите на нашата нација во овој важен регион“.
Новиот стар американски претседател има тешки односи со Европската унија, пишува Франс прес.
– ЕУ е многу лоша за нас. Европејците се однесуваат многу лошо кон нас, не ги прифаќаат нашите автомобили или земјоделски производи. Всушност, речиси ништо. Така да, тие ќе бидат добри за царини, тоа е единствен начин (…) ќе добијат фер-плеј – изјави во една прилика Трамп.
За време на неговата претседателска кампања, Трамп остро го критикуваше трговскиот дефицит со Европската унија и ги спореди со „мала Кина“ која има корист од водечката економска сила во светот.
Во својот прв мандат, Трамп го номинираше Пуздер за секретар за труд во 2017 година, но тој дури и не можеше да ја преземе функцијата бидејќи поднесе оставка поради повеќе скандали.
Неговата поранешна сопруга го обвини за семејно насилство, но подоцна го повлече обвинението. Признал и дека незаконски вработил куќна помошничка.
Работел како адвокат во сојузната држава Мисури, а познат е како противник на абортусот. Неговото назначување мора да биде потврдено од Сенатот.