Портпаролот на Кремљ, Дмитриј Песков, изјави дека Виткоф денес пристигнал во Москва со пораката од Трамп до Путин и дека заминува со одговор. Тој ја нарече втората посета на Виткоф на Русија за две недели „шатл-дипломатија“, како дел од напорите на САД за посредување во постигнувањето прекин на огнот во Украина.
„Ова е токму шатл-дипломатија. Ова се медијаторски услуги што ги обезбедуваат Соединетите Американски Држави“, изјави Песков за новинарот на „Русија 1“, Павел Зарубин.
Средбата меѓу Путин и Виткоф се одржа денес во Кремљ и траеше околу три часа. Двајцата претходно се сретнаа во Санкт Петербург на 11 април. Помошникот на претседателот, Јуриј Ушаков, изјави дека средбата се одржала во конструктивна атмосфера и дека, меѓу другото, била разгледана можноста за продолжување на директни преговори меѓу Русија и Украина.
„Денешниот разговор овозможи приближување на ставовите на САД и Русија, не само за Украина, туку и за други меѓународни прашања“, нагласи Ушаков.
Тој додаде дека, во согласност со договорот меѓу претседателите на САД и Русија, продуктивниот дијалог ќе продолжи. Како особено значајна точка на разговорот, Ушаков ја посочи можноста за директни преговори меѓу Украина и Русија. Рускиот функционер забележа и дека средбата се одржала симболично, на 80-годишнината од историската средба на Елба, кога советските и американските трупи се сретнаа на реката Елба во текот на Втората светска војна.
На состанокот присуствуваа и помошникот на претседателот, Јуриј Ушаков, како и специјалниот пратеник на претседателот, Кирил Дмитриев. Во видео објавено од Кремљ, Виткоф и Путин се ракуваат и разменуваат поздрави.
„Како сте, господине претседателе?“ – праша Виткоф кога влезе во канцеларијата, подавајќи му рака на претседателот.
„Добро. Доста добро. Ви благодарам. Како сте?“ – одговори Путин на англиски со насмевка, ракувајќи се со Виткоф.
Пратеникот на Трамп потоа му рече на Путин дека е навистина среќен што го гледа.
Учесниците на состанокот потоа седнаа на овалната преговарачка маса.