Демократската унија за интеграција изразува длабока загриженост и остро го осудува, како што вели, скандалот во процесот на вработување на Министерството за одбрана и Армијата, каде што истакнуваат единствениот примен етнички Албанец од 74 кандидати е Јасир Ибрахими, внук на лидерот на Алтернатива, Зеќирија Ибрахими.
-Овој селективен избор се случи и покрај фактот што десетици млади дипломирани Албанци аплицираа на конкурсот објавен во мај, но сите, освен роднина на висок партиски функционер на власт, беа елиминирани за време на психолошкиот или физичкиот тест. Само непотизмот го поминува „тестот“, не способноста, не и подготовката.
Ова е сериозен удар врз довербата на младите Албанци и другите заедници во државните институции и во нивната иднина во оваа земја, критикуваат од ДУИ.
Според партијата од Мала Рецица, врвот на иронијата е што во официјалното соопштение од надлежниот ресор се наведува дека „ќе се посвети внимание на еднаквата застапеност на заедниците“.
-Но, она што се случи е спротивното: застапеноста е непостоечка, еднаквоста е нула, додека конкуренцијата е манипулирана. ДУИ апелира до јавноста и до сите локални и меѓународни институции да не го третираат ова како изолиран случај, туку како дел од организиран план за истиснување на Албанците од државните институции, во овој случај од Армијата и Министерството за одбрана. ДУИ нема да молчи пред неправдата и нема да дозволи младите Албанци да бидат исклучени, додека семејствата на оние на власт се редат во институции со политички услуги.
Албанците имаат еднакво право да служат во армијата и да придонесуваат за државата. Нема да застанеме додека не заврши оваа неправда, порачуваат од партијата на Али Ахмети.