Турскиот претседател Реџеп Таип Ердоган по средбата со украинскиот претседател Володимир Зеленски во Анкара изјави дека разговорите во Истанбул треба да се обноват и да продолжат, а Зеленски изрази надеж дека размената на затвореници ќе биде обновена до крајот на годината.
„Веруваме дека продолжувањето на Истанбулскиот процес со поопфатна содржина и на начин што ги опфаќа најитните прашања ќе биде плодно. Очекуваме сите наши партнери кои сакаат да престане крвопролевањето во регионот конструктивно да пристапат кон Истанбулскиот процес“, рече Ердоган во заедничка изјава со Зеленски, која беше емитувана во живо на социјалните медиуми. Двајцата не одговорија на прашања од новинарите.
Ердоган го изрази ставот дека разговорите во Истанбул водат кон дипломатско решение и нагласи дека војната мора да заврши поради зголемените напади врз енергетската инфраструктура и човечките загуби од двете страни.
Турскиот претседател рече дека Анкара ја потврдила својата поддршка за суверенитетот и територијалниот интегритет на Украина, како и за Кримските Татари.
„И покрај војната, поставивме цел нашата трговска размена да достигне 10 милијарди долари. Со поддршка на турските претприемачи, кои, дури и во овие тешки услови, не ја напуштаат земјата и продолжуваат да работат, повторно ќе ја поддржиме Украина во градежништвото… Но, прво, Турција е подготвена да разговара со Русија за активности што ќе обезбедат прекин на огнот и ќе доведат до траен и праведен мир. Во овој поглед, веруваме дека е важно нашиот сојузник САД исто така да се приклучат на процесот“, рече Ердоган.
Зеленски, од своја страна, изрази благодарност до Турција за нејзините напори.
„Принципиелниот став на Турција кон војната што ја води Русија против Украина (…) е многу важен за Украина“, рече Зеленски.
Украинскиот претседател потсети дека изминатата ноќ повторно имало напади, при што загинале вкупно 25 лица, меѓу кои и 2 деца.
„Украина е принудена постојано да се брани од овие напади. Бараме потребни ракети и одбранбена опрема, опрема и воени авиони за нашата воздушна одбрана. Навистина правиме сè што можеме за да ги обезбедиме. Ова не е толку лесно“, рече украинскиот претседател.
Тој нагласи дека неговата земја вложува напори за постигнување мир и истакна дека многу процеси се забрзале.
„Војната мора да заврши и нема алтернатива на мирот. Русија мора да разбере дека убивањето луѓе нема да биде наградено на никаков начин. Покрај тоа, не смее да има можност Русија да започне таква војна против друга соседна земја или земја во регионот. Со Турција споделуваме заеднички став по ова прашање – мора да има гаранции за мир и безбедност. Ќе продолжиме тесно да соработуваме и да се координираме со сите наши партнери. Благодарен сум за поддршката на Турција и сакам уште еднаш да му се заблагодарам на претседателот Ердоган за тоа. Имам доверба во турската дипломатија и нејзината способност да постигне разбирање со Москва“, рече Зеленски.
Тој нагласи дека благодарение на преговорите во Истанбул, 2.000 војници веќе се вратиле дома.
„Се надеваме дека до крајот на годината размената на воени заробеници повторно ќе започне. Турција дава многу голема поддршка во овој поглед и навистина го ценам тоа“, рече Зеленски.
Украинскиот претседател пристигна во Анкара напладне и прво положи венец во мавзолејот на основачот на Република Турција, Мустафа Кемал Ататурк. Подоцна беше пречекан со државни почести во Претседателската палата.
На средбата меѓу шефовите на државите на Турција и Украина присуствуваа и турскиот министер за надворешни работи Хакан Фидан, директорот на турската разузнавачка служба (МИТ) Ибрахим Калин и советникот на Ердоган за надворешна политика и безбедност, Акиф Чагатај. Сепак, официјалните фотографии од почетокот на средбата не го вклучуваа специјалниот пратеник на американскиот претседател Доналд Трамп за Блискиот Исток, Стив Виткоф, за кој се шпекулираше дека ќе присуствува и на средбата во Анкара.