Украинскиот претседател Володимир Зеленски денес телефонски разговараше со францускиот претседател Емануел Макрон, германскиот канцелар Фридрих Мерц и британскиот премиер Кир Стармер за нацрт-верзијата на новиот мировен план на САД за завршување на војната во Украина, објави порталот РБК-Украина, повикувајќи се на извори.
Европските лидери планираат утре да одржат итен состанок на самитот на Г20 во Јужна Африка за да разговараат за мировниот план на САД.
Според „Гардијан“, претседателката на Европската комисија, Урсула фон дер Лајен, наскоро би можела да разговара со Зеленски.
Европската комисија соопшти дека ЕУ не била официјално информирана за подготовката на план од страна на САД и Русија за прекин на војната во Украина.
Претходно беше објавено дека германскиот канцелар Фридрих Мерц откажал серија состаноци денес за да разговара за новиот мировен план со украинскиот претседател Володимир Зеленски и американскиот лидер Доналд Трамп.
Белата куќа соопшти дека планот е поддржан од американскиот претседател и се смета за „прифатлив за двете страни“.
Европските лидери веќе го нарекоа планот на Трамп „капитулација на Украина“ поради недостаток на вистински отстапки од Русија и подготвуваат своја верзија на чекори за решавање на војната меѓу Русија и Украина.