Генералниот совет на Демократската унија за интеграција, на вчерашниот состанок, ја одобри одлуката за повторување на целосната поддршка на ДУИ, како член-основач на коалицијата Национална алијанса за интеграција, за кандидатите на оваа коалиција на локалните избори во општините Гостивар и Врапчиште.
Генералниот совет ја потврди едногласната поддршка за Валбон Лимани, кандидат за градоначалник на Гостивар и Исен Шабани, кандидат за градоначалник на Врапчиште.
ДУИ оценува дека овие кандидатури ја претставуваат сериозноста, посветеноста и визијата на коалицијата за развој на општините и благосостојбата на граѓаните.
Во одлуката се нагласува дека резултатите од изминатите избори покажаа јасна и убедлива разлика во корист на Националната алијанса за интеграција, што дојде како резултат на заедничка работа, ангажман на терен и широка народна поддршка. Генералниот совет верува дека оваа предност ќе се продлабочи дополнително, благодарение на довербата на граѓаните и заедничката посветеност.
-ДУИ потврдува дека ќе се ангажира со сите политички, организациски и човечки капацитети за да ги доведе овие две кандидатури до победа, во интерес на граѓаните на Гостивар и Врапчиште и во функција на нашата заедничка визија за евроатлантска интеграција и одржлив развој, стои во партиското соопштение.