Бројни земји низ целиот свет реагираа откако САД започнаа воен напад врз Венецуела во два часот наутро денес, апсејќи го венецуелскиот претседател Николас Мадуро и неговата сопруга Силија Флорес и одведувајќи ги во САД.
Косово е меѓу земјите кои јасно го поддржаа овој американски чин, во јавно обраќање на претседателката на земјата Вјоса Османи.
„Косово цврсто стои зад американскиот претседател Доналд Трамп по нападот. Кога Америка води, ние гордо стоиме заедно затоа што нашата заедничка слобода зависи од тоа“, напиша Османи на социјалната мрежа X.
Вреди да се потсетиме дека Косово го поддржа и минатогодишниот американски воздушен напад врз Иран.
Украинскиот министер за надворешни работи Андриј Сибиха изјави дека народот на Венецуела мора да има, како што изјави, можност за нормален живот, безбедност, просперитет и човечко достоинство. Тој истакна дека Украина не го признала легитимитетот на Мадуро по, како што тврди, наместените избори и насилството врз демонстрантите. Тој им се заблагодари на сите оние кои, додаде, помагаат во заштитата на животите.
Британскиот премиер Кир Стармер уверува дека Обединетото Кралство воопшто не било вклучено во нападот на САД врз Венецуела и повика на почитување на меѓународното право. Всушност, многу други земји повикаа на почитување на меѓународното право и деескалација. Претседателката на Европската комисија, Урсула фон дер Лајен, повика на мирна и демократска транзиција на власта, објави CNN.
Американците тврдат дека ја нападнале Венецуела и ги уапсиле Мадуро и неговата сопруга за соработка со нарко-картелите и најавија дека ќе им се суди во Соединетите Американски Држави.