Во говорот пред Европскиот парламент во средата, претседателот на Европскиот совет, Антонио Кошта, нагласи дека само Данска и Гренланд можат да одлучат за судбината на Гренланд и дека земјите-членки на ЕУ се обединети во поддршката на принципите на меѓународното право, територијалниот интегритет и националниот суверенитет.
– Не можеме да прифатиме дека законот на најсилниот преовладува над правата на најслабиот, бидејќи меѓународните правила не се прашање на избор, а сојузите не можат да се сведат на низа трансакции, рече Кошта во говорот пред пленарната седница на Европскиот парламент.
Претседателот на Европскиот совет, кој исто така свика вонреден самит на ЕУ за четврток поради Гренланд, предупреди дека геополитичките предизвици со кои се соочува Европската Унија понекогаш изгледаат застрашувачки, споменувајќи го продолжувањето на тоталната руска агресија врз Украина, но и дека во такви околности меѓународното право не смее да се поткопува и клучните сојузи не смеат да бидат загрозени. Тој призна дека евроатлантските односи се на тест.
Зборувајќи за заканите на американскиот претседател Доналд Трамп за воведување дополнителни тарифи за некои земји од ЕУ, Кошта рече дека токму ваквите мерки би ги поткопале трансатлантските односи и би биле некомпатибилни со трговскиот договор меѓу ЕУ и САД.
– Подготвени сме да се одбраниме себеси, нашите земји, нашите граѓани и нашите компании од секаков облик на принуда. Европската Унија има сила и инструменти за ова, заклучи Кошта.