Моќната бура „Хари“, која го зафати Медитеранот, донесе огромни бранови и обилни врнежи, претворајќи ги улиците во реки и предизвикувајќи сериозна материјална штета.
На островот Липари, недалеку од Сицилија, масивен олуен бран удри во пристаништето и за кратко време ги поплави околните улици. Во Катанија, вториот по големина град на островот, брановите предизвикаа голема штета во еден ресторан. Надзорни камери го забележаа моментот кога силен бран ги разби прозорците и ја уништи внатрешноста.
Снимките од островот покажуваат поплавени улици полни со вреќи со отпад, додека во пристанишниот град Месина состојбата била толку тешка што се урнал дел од крајбрежната шеталишна конструкција.
Властите издадоа црвени предупредувања за Сицилија, Сардинија и Калабрија поради ветрови со ураганска јачина, поројни дождови и опасни бранови. На Сицилија се регистрирани удари на ветер до 119 километри на час, висината на брановите надминала девет метри, а во Катанија нивото на морето пораснало за повеќе од пет метри.
Поради влошените услови, наредени се превентивни евакуации и околу 190 лица се изнесени од најзагрозените подрачја. Сите траектни линии кон Сардинија и помалите острови се суспендирани, а во повеќе градови се затворени училиштата, парковите и спортските објекти. Се очекува на островот за само два дена да наврнат и до 300 милиметри дожд.
Бурата го зафати и соседниот остров Малта, каде силни бранови исто така ги поплавија улиците. Забележани се ветрови со брзина до 105 км/ч, а на жителите во одредени делови им беше препорачано да останат во своите домови.
Малтешката служба за цивилна заштита ги предупреди граѓаните да избегнуваат работа на висина, вклучувајќи покриви, балкони и скелиња, како и да се држат подалеку од брегот и крајбрежните патеки. Летовите и траектите кон Малта беа пренасочени или откажани, а итните служби регистрираа повеќе од 180 интервенции.
Последиците од бурата се почувствуваа и во други делови од Медитеранот. Шпанија издаде жолти предупредувања за ветер и високи бранови во јужната област Андалузија, особено во крајбрежните градови Малага и Алмерија, каде се очекуваа удари на ветер до 69 км/ч. Во Франција, крајбрежните области на северозападот исто така се соочија со обилни дождови и силни ветрови.