Потегот е во спротивност со построгите миграциски политики што се спроведуваат во други делови на Европа.
„Ќе можат да работат во кој било сектор и во кој било дел од земјата“, изјави министерката за миграции Елма Саиз на прес-конференција.
Шпанската влада смета дека со оваа мерка ќе се пополни недостигот од работна сила и ќе се ублажат последиците од стареењето на населението. „Владата ќе го регулира статусот на овие луѓе за да им обезбеди права на оние кои веќе живеат во Шпанија“, додаде Саиз.
Мерката се однесува на лица кои непрекинато престојувале во Шпанија најмалку пет месеци до 31 декември, како и на оние кои поднеле барање за меѓународна заштита пред тој датум. Како доказ ќе може да се приложи кој било јавен или приватен документ, или комбинација од такви документи.
Апликантите ќе мора да имаат чисто кривично досие и да не претставуваат закана за јавниот ред. Дозволите ќе важат и за нивните деца кои веќе живеат во земјата. Се очекува рокот за поднесување барања да започне во април и да трае до крајот на јуни.
Планот ќе биде усвоен со уредба, без гласање во парламентот, каде што коалицијата предводена од социјалистите нема мнозинство.
Конзервативната и крајнодесничарската опозиција остро ја критикуваа одлуката, предупредувајќи дека ваквите мерки ќе поттикнат дополнителна нелегална миграција. Лидерот на Народната партија, Алберто Нуњез Феихо, напиша на социјалната мрежа Икс дека „апсурдниот“ план ќе ги преоптовари јавните служби. „Во социјалистичка Шпанија, нелегалното се наградува“, порача тој, најавувајќи целосна промена на миграциската политика доколку дојде на власт.
Шпанската католичка црква, пак, беше меѓу организациите што ја поздравија мерката, оценувајќи ја како „чин на социјална правда“.
Премиерот Педро Санчес смета дека на Шпанија ѝ се неопходни мигранти за да се пополнат празнините на пазарот на труд и да се намали притисокот од стареењето на населението, кое може да ги загрози пензискиот систем и државата на благосостојба.
Според официјалните податоци објавени во вторникот, 52.500 од 76.200 нововработени во последниот квартал од минатата година биле странски државјани. Поотворениот пристап на Шпанија е во контраст со трендот во Европска Унија, каде што многу влади ги заоструваат миграциските политики под притисок на крајната десница.
Според податоците на тинк-тенкот Funcas, на почетокот на јануари 2025 година во Шпанија живееле околу 840.000 недокументирани мигранти, најмногу од Латинска Америка.
Шпанија е една од главните европски влезни точки за нелегални мигранти кои бегаат од сиромаштија, конфликти и прогон, при што десетици илјади, главно од субсахарска Африка, пристигнуваат на Канарските Острови. Според Националниот статистички завод, во земјата живеат повеќе од седум милиони странци од вкупно 49,4 милиони жители.