Италија успешно спречила серија руски кибернетички напади насочени кон објекти на италијанското Министерство за надворешни работи на Италија, меѓу кои и амбасадата во Вашингтон, како и кон интернет-страници поврзани со Зимските олимписки игри и хотели во Кортина д’Ампецо, изјави италијанскиот министер за надворешни работи Антонио Тајани.
Според неговата изјава, станува збор за координирани кибероперации кои, како што наведе, потекнувале од Русија и биле насочени кон чувствителни државни и стратешки локации. „Ова се акции од Русија. Спречивме низа кибернапади врз локации на Министерството за надворешни работи, почнувајќи од Вашингтон, а цел на нападите беа и одредени локации поврзани со Зимските олимписки игри, вклучително и хотели во Кортина“, изјави Тајани. Неговите наводи ги потврди и портпаролот на Министерството.
Италијанските власти не соопштија дополнителни детали за природата на нападите, ниту дали тие предизвикале каква било материјална штета, но нагласија дека безбедносните служби навреме реагирале и спречиле компромитирање на системите.
Кортина д’Ампецо е една од клучните локации за организација на претстојните Зимски олимписки игри, поради што безбедноста на дигиталната инфраструктура е од особено значење. Во последните години, кибернападите врз државни институции, дипломатски претставништва и големи меѓународни спортски настани стануваат сè почести, а западните земји сè почесто ја посочуваат Русија како извор на такви активности.
Изјавата на Тајани доаѓа во време на зголемени тензии меѓу Русија и западните држави, при што киберпросторот сè повеќе се смета за едно од главните полиња на современите геополитички конфликти.