Македонскиот пејач Даниел Кајмакоски бил киднапиран синоќа во Белград, пишува „Блиц“. Велат дека се бараат киднаперите, а пејачот бил врзан, возен во својот автомобил и му барале 20.000 евра.
Кајмакоски наводно бил возен од Бетон Хала до Рума, каде што, кога полицијата се обидела да ги запре, удриле во тротоар, излегле од автомобилот и избегале. Се сомнева дека киднаперите се странски државјани.
Пејачот е познат на регионалната публика како победник на првата сезона на „X Factor Adria“, подоцна ја претставуваше Македонија на Евровизија, а соработуваше и со Жељко Јоксимовиќ.
Драмата започнала синоќа околу 00:50 часот пред ноќниот клуб „Лафајет“ во Бетон Хала, каде што Кајмакоски имал настап. По настапот, тој се упатил кон своето бело Волво XC 60, кое било паркирано на трамвајската станица на улицата Караѓорѓева бр. 2-4, пишува Telegraf.rs.
Според информациите, кога влегол во возилото и седнал на возачкото седиште, непознат маж му се приближил. Му се заканил и употребил физичка сила за да го принуди да ги испружи рацете, а потоа ги врзал со селотејп. Првиот киднапер потоа го презел воланот, додека вториот седел на задното седиште со пејачот. За време на киднапирањето, тие наишле на редовна ноќна патрола, а кога полицијата се обидела да ги запре, автомобилот забавил за момент и тие одеднаш стапнале на гаста, што е видливо и на видео, објавено на социјалните мрежи.
Во тој период, возачот во автомобилот разговарал со Кајмакоски на лош англиски јазик, додека на турски му ги преведувал упатствата на својот соучесник. Наводно, цело време му држеле пиштол во главата, барајќи ја гореспоменатата сума пари во замена за неговиот живот. Telegraf.rs пишува и дека се заканиле дека ќе ја убијат неговата сопруга и двете малолетни деца ако парите не бидат пренесени.
Во големата потера биле вклучени неколку полициски возила и полицајци од Полициската станица Рума. Во близина на Рума, полицијата се обидела да постави блокада на патот кога киднаперот ја изгубил контролата врз возилото и насилно се удрил во заштитна ограда. Потоа киднаперите го искористиле мракот и избегале, додека полицијата го пронашла пејачот во смачкан автомобил, но без никакви физички повреди.
Областа сега е под блокада, а во потрагата се користат кучиња трагачи и дронови. Даниел Кајмакоски бил донесен во полициската станица, каде што дал изјава за трауматското искуство. Тој одбил лекарски преглед.