Полицијата соопшти дека рано утрово бил уапсен поранешниот прв вицепремиер и екс-министер Артан Груби. Тој се појавил на граничниот премин Блаце и веднаш бил лишен од слобода.
„Денеска (23.02.2026) во 06:10 часот на Граничниот премин Блаце, на влез во државата, од слобода е лишен Артан Груби (48), кој беше баран со меѓународна потерница за истрага за сторено кривично дело по чл.354 ст.5 в.в. ст.3 в.в ст.1 в.в со чл.22. од КЗ“, се вели во соопштението на Министерството за внатрешни работи.
Груби е приведен за кривично дело „проневера во службата“ во Државна Лотарија, каде заедно со Перпарим Бајрами се осомничени дека нарачале ВЛТ апарати и проневериле 8,2 милиони евра државни пари. Според соопштението на обвинителството, Груби знаел дека Лотарија нема право самостојно да приредува вакви игри и оти владата, како целосен сопственик на Државната лотарија, во својство на акционерско собрание, нема надлежност да одлучува за конкретната зделка.
За набавка на ВЛТ-апаратите од над 500 милиони денари или над 8 милиони евра, кои никогаш не биле ставени во употреба, првоосомничен е поранешниот директор на Државната лотарија. Тој до Владата предложил да набави коцкарски машини, иако знаел дека нема право да ги користи.
Груби од 9 декември 2024 е на црната листа на САД поради „вмешаност во значителна корупција преку примање мито за поткопување на судските процеси.
Екс-функционерот беше во бегство од 16-ти декември 2024 година.
Повеќе детали за неговото апсење се очекуваат во текот на денешниот ден.