Европската унија планира привремено да ја суспендира ратификацијата на трговскиот договор со Соединетите Американски Држави поради неизвесноста околу тарифите што ги наметна претседателот Доналд Трамп.
Главните политички групи во Европскиот парламент објавија дека ќе ја суспендираат работата за одобрување на договорот откако Врховниот суд на САД ја поништи одлуката на Трамп за воведување реципрочни тарифи низ целиот свет, објави Блумберг.
По одлуката на судот, Трамп објави воведување глобална тарифа од 10 проценти, која потоа ја зголеми на 15 проценти, што предизвика неизвесност кај трговските партнери на САД и дополнителни економски турбуленции.
Главниот преговарач на Европската народна партија (ЕНП) за договорот со Соединетите Американски Држави, Жељана Зовко, изјави дека Европската унија нема друга опција освен да ја одложи ратификацијата додека не добие појасни информации за новите тарифи.
Покрај ЕНП, суспензијата на ратификацијата ќе ја поддржат и социјалистите и демократите, како и либералната група „Renew“.
Претседателот на трговскиот комитет на ЕУ, Бернд Ланге, свика итен состанок за да се разгледа партнерството меѓу Европската Унија и САД.
Трговскиот договор меѓу Брисел и Вашингтон, постигнат минатото лето, наметнува тарифи од 15 проценти за поголемиот дел од европскиот извоз во САД, а американската стока ќе влегува во Европската Унија без царина.
Според договорот, САД ќе задржат тарифи од 50 проценти за увоз на европски челик и алуминиум.
Европскиот парламент првично изјави дека ќе го ратификува договорот во март, но процесот сега е дополнително одложен.