Соединетите Американски Држави го одложија рокот за продажба на меѓународните средства на руската нафтена компанија Лукоил до 1 април, со цел да ја искористат трансакцијата како потенцијален адут за преговарање во мировните преговори за Украина.
Ова го објави Ројтерс, повикувајќи се на извори запознаени со преговорите и сопствен преглед на документите.
Канцеларијата за контрола на странски средства на САД (OFAC), која работи во рамките на Министерството за финансии, го продолжи претходниот рок што истече на 28 февруари, давајќи им на потенцијалните купувачи дополнително време да преговараат за средства проценети на околу 22 милијарди долари.
Ова е четврто одложување откако беа воведени санкции врз руските енергетски компании во октомври, потсетува британската агенција.
Според изворите, процесот на продажба на средствата на Лукоил сега е подигнат на повисоко политичко ниво и е директно вклучен во пошироките преговори меѓу Вашингтон, Москва и Киев.
Санкциите ја опфаќаат и најголемата руска нафтена компанија Роснефт, а следната рунда преговори е планирана за март.
Меѓународните средства на Лукоил опфаќаат широко меѓународно портфолио, вклучувајќи нафтени полиња, рафинерии и бензински пумпи од Ирак до Финска.
Повеќе од десетина понудувачи моментално се заинтересирани за овие средства, вклучувајќи го американскиот енергетски гигант Ексон Мобил, инвестицискиот фонд Карлајл Груп и партнерството помеѓу Шеврон и Квантум Капитал Груп.
Ситуацијата е дополнително комплицирана од тврдењата на украинскиот претседател Володимир Зеленски дека Русија предложила економски договор вреден дури 12 трилиони долари на администрацијата на Трамп, кој ги вклучува средствата на Лукоил.