САД сакаат да ги поделат европските влади, кои поединечно имаат помала моќ, изјави Каја Калас, висока претставничка на Европската Унија за надворешни работи и безбедносна политика.
„Она што мислам дека е навистина важно сите да го разберат е дека САД беа многу јасни дека сакаат да ја поделат Европа. Не ја сакаат Европската Унија“, изјави шефицата за надворешна политика на ЕУ за Фајненшл тајмс, додавајќи дека пристапот на Вашингтон ги одразува тактиките што ги користат „противниците“ на ЕУ.
Таа, исто така, призна дека Брисел и Вашингтон имаат „многу комплициран однос“. Калас истакна дека земјите од ЕУ во моментов се поделени околу тоа како да одговорат на политиката на САД. Сите членки на ЕУ треба да се обединат за „заедно да се справат со американскиот претседател Доналд Трамп“.
Таа, исто така, рече дека ЕУ има „простор и да го смири Трамп и да ја намали својата зависност од САД“. Според неа, потребно е да се продолжи да се купува она што Европа не може сама да го произведе, а во исто време да се инвестира во сопствената одбранбена индустрија за да не се „стават сите јајца во една кошница“.
Ажурираната Стратегија за национална безбедност на САД објавена на 5 декември предизвика загриженост дека Европа ќе претрпи радикална трансформација за 20 години и ќе биде на работ на уништување како цивилизација поради субверзивните политики на раководството на ЕУ и другите наднационални структури. Во овој поглед, американската администрација изрази сомнежи дека некои европски држави ќе имаат економски и воен капацитет да останат сигурни сојузници на Вашингтон.