Грчкиот премиер Киријакос Мицотакис ги посочи можните последици што војната на Блискиот Исток би можела да ги има врз Грција и Европа, нагласувајќи дека Европа мора да биде подготвена, со јасен и употреблив план, во случај на напад врз нејзина територија.
Тој на Фејсбук објави дека настаните што се случуваат на илјадници километри оддалеченост директно влијаат врз Грција и Европа – од геополитичките тензии и енергетската несигурност до промените во економијата, работата и функционирањето на државата, бидејќи, како што вели, сè е меѓусебно поврзано и обликува нова средина на предизвици, но и можности.
Мицотакис предупредува дека продолжената геополитичка тензија на Блискиот Исток не е далечна криза и потсетува дека таа веќе предизвика силен енергетски шок, со директни последици за домаќинствата и бизнисите низ цела Европа.
„На Европскиот совет во Брисел разговаравме за целиот спектар на влијанието на кризата, врз цените на енергијата, врз потрошувачите и компаниите, но и врз миграцијата. Потребни се насочени национални интервенции. Во исто време, Европа мора да има специфична алатка, способна да понуди привремена и насочена поддршка на домаќинствата и бизнисите. Ова е другата страна на конкурентноста, за која детално разговаравме во Европскиот совет, за да не се соочиме со енергетска криза“, укажа премиерот на Грција.
Според него, неодамнешните напади врз критичните енергетски објекти во земјите од регионот дополнително го оптоваруваат глобалниот синџир на снабдување и влијаат на цените на енергијата на меѓународно ниво.
Тој, исто така, посочи на напредокот во заштитата на Европа и потсети дека се дискутирало како да се даде суштинска содржина на клаузулата на ЕУ за меѓусебна помош.
„Солидарноста што Грција и другите земји-членки на ЕУ ја покажаа кон Кипар докажа дека Европа може да биде обединета. Сепак, таа мора да биде подготвена да има јасен и употреблив план во случај на напад врз европска територија“, заклучи Мицотакис.