Ви соопштив дека 13 милиони евра ваши пари, пари на граѓаните, Никола Груевски во само три годни ставил на сметките на телевизиите под негова контрола, Сител, Канал 5 и Алфа.
Денеска ќе ви соопштам колку пари легнале на сметките на Сител, Канал 5 и Алфа на 11 мај – понеделник, првиот работен ден, по инцидентот во кумановската Дива населба на 9 мај – сабота.
На сметката на телевизија Сител, на 11 мај, власта на Груевски, префрлила над 930.000 евра!
На сметката на телевизија Алфа, на 11 мај, власта на Груевски префрлила над 930.000 евра!
На сметката на телевизија Канал 5, на 11 мај, власта на Груевски префрлила над 820.000 евра!
Или, власта на Никола Груевски на 11 мај префрлила на Сител, Алфа и Канал 5 над 2.600.000 евра! Тоа е ден по трагичниот инцидент во Куманово, кога загинаа полицајци, а стотици луѓе останаа без домови.
-Што платиле Никола Груевски и неговите соработници во власта, на Сител, Алфа и Канал 5 со над 2.600.000 евра народни пари?
-Како веднаш по трагичниот инцидент во Куманово на 9 мај, додека семествата на загинатите полицајци беа во огромна болка, додека стотици семејства лелекаа по срушените домови, додека јавноста во Македонија се прашуваше што `и се случува, Никола Груевски прво на што мислел биле милионите евра народни пари за Сител, Алфа и Канал 5?
Тоа се дел медиумите под контрола на Груевски коишто за трагичниот инцидент во Куманово оркестрирано ги лажеа граѓаните дека некој подготвувал дестабилизација на Македонија, иако информациите подоцна открија вмешаност токму на високи владини функционери во случајот.
Почитувани граѓани,
Ова е класичен пример како Никола Груевски создава лажна реалност во Република Македонија.
Тоа Груевски и неговите соработници го прават со помош на сопствениците на медиумите под контрола, Горан Иванов, Стојменов, Јевросимовиќ, главните уредници Павловиќ Латас, Богатинова, Чашиле.
Еве затоа Никола Груевски не сака да се договори за објективни медиуми.
Бидејки Груевски нема да може да нарачува прилози, очајно да се слика и лаже пред триумфални капии, тоа да се врти по цел ден на телевизиите, да се обидува да дестабилилизира кога ќе им текне на него и на партнерите.
Ова што денеска го соопштив е уште една од причините зошто без да се обезбедат услови за објективно известување во медиумите не се можни фер и регуларен предизборен и изборен процес.
Без фер избори не е можна нормализација и стабилизација на Република Македонија.
Затоа, без медиумска регулација избори нема да има!
Новата Влада во Македонија што ќе ја предводи СДСМ ќе овозможи непристрасно и објективно информирање на граѓаните.