Владејачката Демократска партија на социјалистите (ДПС) на црногорскиот премиер Мило Ѓукановиќ победи на вчерашните парламентарни избори во Црна Гора, освојувајќи најмногу гласови, но не и апсолутно мнозинство во Парламентот. 
Како што јави Танјуг, според резултатите од 94 отсто обработени гласачки места, ДПС освоила 41,1 отсто од гласовите и 36 пратеници во 81-членото Собрание на Црна Гора.
На второто место се пласира опозискиот блок Демократси фронт со 20,4 отсто освоени гласови и 18 мандати, а на третото место Големата коалиција “Клуч“ со 10,6 проценти од гласовите и девет пратеници.
Партијата Демократи на Алекса Бечиќ освои 9,7 отсто од гласовите, со што доби осум пратеници, а Социјалдемократската партија (СДП) пет процени и четири мандати.
По две места во Парламентот освоија Бошњачката партија (БС) и партијата Социјалдемократи, а по еден мандат Хрватската граѓанска иницијатива (ХГИ) и коалицијата „Албанци решително“.
Најголем неуспех на изборите доживеа партијата Позитивна Црна Гора, која освои само 1,3 отсто од гласовите и не успеа да го мине изборниот цензус.
Одѕивот на изборите бил 73,2 отсто.
По објавувањето на првичните нецелосни резултати од изборите, Ѓукановиќ прогласи победа на неговата партија.
– Ја заштитивме земјата и правото да управуваме со нашата иднина, рече Ѓукановиќ, додавајќи дека Црна Гора ќе продолжи на патот за членство во ЕУ и НАТО.
На партијата на Ѓукановиќ и недостасуваат пет мандати за апсолутно мнозинство во Парламнетот, но нив лесно може да ги обезбеди од редовите на малцинските партии, кои традиционално коалицираат со ДПС, и да формира мнозинска влада.
Ѓукановиќ најави дека веднаш по објавување на конечните резултати од изборите, ќе започне со преговори за формирање коалиција со Социјалдемократите и со партиите на националните малцинства.
Но, од друга страна, лидерот на ДФ, Емилио Лабудовиќ пак прогласи „победа на опозицијата“ на вчерашните избори.
– Резултатите покажуваат дека опозицијата ја има победата, односно 42 мандати. Црна Гора се ослободува од спрегите на ДПС. Почитувани граѓани на Црна Гора, слободата пристигнува и јас ви ја честитам, изјави Лабудивиќ.