Во Специјалното јавно обвинителство до вчера на пладне не беше стигнало писмо од мандатарот Зоран Заев, кој синоќа најави дека ќе побара од СЈО да одговори дали за некои од предложените министри во новиот владин кабинет, но и за него, се води кривична постапка, пишува СДК.
Заев рече дека ако за некои од предложените имиња добие таков податок, таквите случаи нема да бидат членови на новата Влада.
Во СЈО сметаат дека ова обвинителство евентуално би можело да даде податоци дали за некое лице е отворено истрага. Предистражните постапки се тајни.
Освен тоа, потсетуваат експертите, прислушуваните материјали не се во целост преслушани, па не се знае дали некој од кабинетот на Заев, ако сега не е, нема да се најде на листата на осомничени за кои СЈО ќе отвори кривична постапка.
Претседателот на Собранието Талат Џафери за денеска закажа собраниска седница за избор на новата влада и за гласање на предложената владина програма на мандатарот Заев. Владата треба да се избере до среда на полноќ.