МВР ги поништило личните карти на лицата за кои се утврдило дека се издадени на незаконски начин, со цел да се злоупотребат за гласање на претходните избори, јави Телма.
Детектирани се и многу слабости во начинот на издавањето на документите, како и при впишувањето на живеалишта и престојувалишта.
Спасовски вели и дека, за целосно прочистување на избирачкиот список, ќе треба да се бара системско решение на поврзување на институциите со цел да се отстрани човечкиот фактор при раководењето со овие документи и системи. Претседателот на ДИК, пак, рече дека веќе се работи на такво решение.
Чичаковски потенцираше дека, степенот на точност на овие податоци зависи од точноста на податоците кои ги добиваат од МВР, Управата за водење на матична евиденција, Регистарот на улици, Катастарот и судовите. Во ажурирањето на списокот помогнале и локалните референдуми. Пред овие избори нема да има активна регистрација, односно ставање на спорните 28.000 гласачи на посебен список со барање самите да се пријават, иако по претходните избори беа вратени во избирачкиот список. Вели дека, за тоа е потребна политичка одлука и измени во Изборниот законик, за кои сега нема време.
Смета дека редовното ажурирање на списокот, ќе даде добри резултати, но на претходните избори имаше низа пропусти околу вкрстувањата на податоците од институциите, што доведе до тоа, првпат лица што имаат право на глас да не се пронајдат на списокот. Поранешниот претседател на ДИК, Александар Новаковски, смета дека за тоа е најдобро сепак да се направи активна регистрација.
Откако ќе се распишат изборите, списокот со новата состојба ќе се стави на јавен увид, а ќе се достави и до партиите, кои ќе имаат рок од пет дена да ги достават забелешките. На последното ажурирање, бројот на гласачи во избирачкиот список бил 1.820.000 гласачи и веројатно таа ќе биде и конечната бројка./Телма