Министерот за здравство, Арбен Таравари, при денешната посета на штипската клиничка болница изјави дека во својата 20-годишна лекарска кариера не видел толку лоши услови за болните.
„Условите се крајно лоши. Не знам дали постои друга болница како штипската со вакви лоши услови за работа. Ние како Влада ќе направиме сè што можеме, барем да импровизираме колку-толку условите да бидат пристојни за работа за наредните две години“, изјави Таравари по обиколката.
Таравари најави климатизирање на сите простории, дезинфекција и уредување на старата болничка зграда… 2019 е крајниот рок за довршување и пуштање во употреба на новата зграда на оваа болница. Минатиот месец, по инспекцијата во оваа болница, беше разрешен и медицинскиот директор Александар Стојановски, а на негово место е назначен д-р Ален Ѓорѓиев, бидејќи е констатирана нехигиена, неетичко однесување и нерегуларности во работењето, соопштија од Министерството за здравство.