Издавачката куќа „Бата прес“ го објави романот „Десет илјади љубовници“ од познатата канадско-израелска писателка Едит Равел.
Станува збор за тажни, драматични и трагични љубовни приказни што се одвиваат во различни места во Израел, Лондон, Канада, САД и во различни периоди во втората половина на дваесеттиот век. Во заднината на љубовната приказна се отсликуваат времиња и места преполни со војни, тероризам, мачења, шпионажа, диктатура.
Главниот лик, Лили, е млада студентка која се вратила од Канада и ги истражува јазикот, убавините и ужасите на родната земја. Таму го запознава човекот од своите соништа. Поранешниот актер Ами е згоден, интелигентен и возбудлив. Тој, како и неговата преубава земја, е под притисок и има една тешка професија: тој е воен иследник. Додека љубовта на Лили и Ами неочекувано цвета, над неа се надвива сѐ потемна сенка – проблемот што го наметнува работата на Ами.
Дејствието во романот „Десет илјади љубовници“ во најголем дел се случува во Израел и е позадина за универзалната приказна за страста, страдањето и чудесната моќ на љубовта. Комплексноста на приказната се продлабочува со тоа што љубовта и трагичните настани се случуваат меѓу млади луѓе од различни држави, професии, вери, па и различни етнички заедници во една земја „Храбар прв роман, се чита без здив… На прв поглед едноставните и непосредни реченици на Равел често одекнуваат со бројни значења, можности и иронија, маѓепсуваат и продираат…“, пишува за романот GlobeandMail, од Торонто.
Едит Равел е израелско – канадска авторка, родена 1955 година во Израел, а на седумгодишна возраст нејзиното семејство се сели во Монтреал.
Во Израел студирала англиски јазик и книжевност, а по докторските студии за еврејскиот јазик и креативно пишување има предавано на три факултети во Канада.
За автобиографскиот роман „Десет илјади љубовници“ има добиено голем број награди во Канада, Израел и Велика Британија… Романот од англиски на македонски го преведе Љубомир Шикоски и е објавен во едицијата на популарни бестселери „Книга достапна секому“.