Лесново може да стане првиот геопарк во Македонија. Постапката за аплицирање до УНЕСКО е веќе започната. Експертите за туризам сметаат дека специфичниот вулкански терен, единствен на Балканот е вреден да се запише на листата на заштитени природни подрачја и дека одговорот ќе биде позитивен, информира ТВ24.
„Просторот е интересен, бидејќи има доста зачувано сочувано траги од некогашен вулканизам, форми кои се раритет, не само кај нас, туку и пошироко“, вели Ивица Милевски, универзитетски професор.
Од здружението „Илински врв“ што веќе една деценија во Лесново развиваат рурален туризам велат дека иако и сега доаѓаат туристи од различни делови на светот, тоа не е доволно да може да се егзистира од оваа дејност. На ветер во грбот се надеваат, ако Лесново биде прогласено за геопарк.
„Тоа ќе биде бомба за туризамот, и за нас како невладино здружение и многу ќе значи.“ – вели Зоран Петров, Здружение „Илински врв“ – Лесново.
Членството во мрежата на геопаркови носи и пристап до повеќе пари потребни за развој, но и можност за поголема заштита на природните реткости.
„Предноста ќе биде што прогласената област за гео парк, ќе имаат пристап до многу развојни фондови“ – вели Ивица Милевски.
„Ние истовремено правиме и конзервација на природата и да развиеме разни форми на екосистемски услуги и туризам и брендирање на производи, од кои сите ќе имаат придобивки“ , вели Методија Саздов од Програмата за подобрување на заштитени подрачја.
Иако Македонија има многу природни убавини и реткости досега ниту едно подрачје не се нашло на листата на УНЕСКО. На Балканскиот полуостров, геопаркови има во Грција, Словенија, Хрватска и Бугарија, а наскоро се очекува да добие и Србија.