Поради врнежите од снег забрана за движење на тешки товарни возила има на патните правци Маврово – Дебар, Струга – граничен премин Ќафасан, како и на планинските премини Пресека, Стража и Буково.
Како што информираат од Авто-мото сојузот на Македонија (АМСМ) сообраќајот на државните патишта се одвива по влажни коловози, а на сите сообраќајни патни правци во државава врне снег. Оттаму ги потсетуваат возачите дека законската обврска за задолжително поседување на зимската опрема во возилата, трае до 15-ти март 2018 година.
Поради појава на магла видливоста е намалена од 15 до 20 метри на Попова Шапка и на планинскиот премин Стража до 100 метри.
АМСМ препорачува внимателно возење, прилагодена брзина на движење и почитување на поставената сообраќајна сигнализација. Во клисурите и засеците можна е појава на одрони, особено на патните правци: Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.
Интензитетот на сообраќајот на патните правци надвор од градските средини е умерен. На граничните премини нема подолги задржувања за влез и за излез од државата. Оваа информација се однесува само за македонската страна на премините.