Претседателот на Косово Хашим Тачи го поздрави вчерашното гласање во македонското Собрание за измена на Уставот и оцени дека „Македонија го одбра патот на европските интеграции и направи чекор напред кон јакнењето на мирот во целиот регион“. 
– Собранието на Македонија синоќа даде пример како се обединуваат сите партии за доброто на нивните граѓани и на државата. Државата јакне и се интегрира кога народните избраници носат исправни одлуки и се надминуваат политичките изнтереси заради држaвните интереси. Република Косово се радува на оваа мошне значајна одлука на нашата соседна држава, напиша денеска Тачи на Фејсбук.
Според косовскиот претседател, „мирот и стабилноста во регионот ќе ги зацврстиме единствено со покажување готовност во евроатлантската ориентација и со вложување многу труд за интегрирање во европското семјество“.