Градоначалникот на Скопје, Петре Шилегов, утрината објави фотографија и видео материјал од безбедносна камера, на кои се гледа едно лице како го расфрла градежниот материјал донесен за изградба на зелениот покрив на ГТЦ.
„Нема да застанеме заради вакви „луѓе“. Скопје ќе го биде. Сакал некој или не !!“-напиша Шилегов на својот ФБ профил.
Во февруари беше најавено дека летово дел од Градскиот трговски центар ќе добие зелен покрив. Треба да бидат зазеленети 1.800 квадратни метри од покривот што гледа кон Плоштадот Македонија. Според проектот ќе бидат засадени 29 висококвалитетни дрвја и повеќе од 30 други видови садници. Ќе бидат поставени неколку водени зони во форма на фонтани и базени, монтажна бина, партерно шаховско поле, кафуле, како и модерна урбана опрема од клупи, корпи за отпадоци и паркинзи за велосипеди.