Пред почетокот на денешното рочиште за предметот „Шамари во Општина Центар“, поранешната специјална јавна обвинителка, Фатиме Фетаи изјави дека исказот на советникот за национална безбедност на премиерот Зоран Заев, Зоран Верушевски на последното рочиште за предметот „Таргет-Тврдина“ дека „бомбите“ биле модифицирани и компромитирани, нема да влијае врз постапките на СЈО.
„Тоа не може да влијае на автентичноста на материјалите со кои располагаме, ниту на постапките. Станува збор за исказ кој не е довршен“, рече Фетаи.
Таа додаде дека Верушевски ќе биде уште испрашуван и од странките во постапката и од судот.
– Сакам да напоменам дека никогаш во судница обвинетите не ја кажале онаа фраза: „Сечени, лепени, монтирани“, што ја кажуваа во медиумите. Толкување и појаснување може да даде само Верушевски, рече обвинителката Фетаи.