Експертот за Балканот од Универзитетот во Грац, Флоријан Бибер, оцени дека ладниот став кон преговорите за пристапување на нови членки од Западен Балкан во Европската унија може да го наруши кредибилитетот на Унијата.
„Набљудувачите во регионот ја гледаат француската и холандската политика како несериозна и мотивирана од домашната политика и стереотипите. Ова го нарушува имиџот на ЕУ како фер играч со фер критериуми, особено затоа што комисијата даде зелено светло за преговори“, рече Бибер во изјавата за „Euronews“.
Министрите за надворешни работи на ЕУ вчера во Луксембург не можеа да се договорат за датумот за почеток на преговорите за членство со Северна Македонија и Албанија, што ќе го финализираат шефовите на држави или влади на самитот на ЕУ во Брисел во четврток.
Франција и Холандија побараа властите во Скопје и Тирана прво да ги исполнат буквално сите услови, додека повеќето министри беа за одобрување веднаш да го одобрат започнувањето на преговорите, велат изворите.
Бибер рече дека овој став најверојатно ќе испрати негативен сигнал до владите на Северна Македонија и Албанија, кои може да мислат дека не вреди да се направат тешки компромиси доколку не бидат примени во европскиот блок.
Особено тешко ќе биде за Северна Македонија, која работеше толку напорно за решавање на проблемот со името, додаде тој.
Тој рече дека овој став испраќа и порака до Србија и Косово, кои го имаат најтешкото прашање за решавање во регионот и се прашуваат зошто некој од нив би склучил тежок договор кога ЕУ може да не им даде ништо за возврат.
Слично мислење има и аналитичарот на ЛСЕ и професор Џејмс Кар-Линдзи, кој на својот Твитер профил напиша дека германската канцеларка Ангела Меркел ќе лобира за почеток на преговорите со Северна Македонија и Албанија со францускиот претседател Емануел Макрон на утрешниот самит на ЕУ.
„Меѓутоа, на крајот, неуспехот да се разгледа ситуацијата со Северна Македонија ќе го наруши кредибилитетот на ЕУ и ќе го прикаже (европскиот) блок како неспособен да се справи со нејзиното непосредно опкружување, а камоли да има влијание и надвор од нејзините граници“, напиша Кар-Линдзи.