Премиерот Зоран Заев во опширно интервју за порталот „Фронтлајн“, вели дека очекува опозициската ВМРО-ДПМНЕ на „мала врата“ да го врати национализмот, па дури и радикализмот.
„Не ми беше мене лесно кога губев македонски гласови, затоа што изградив еден ваков концепт (Едно општество за сите) и застанав зад него. Ги гледав и ги броев секој ден како ги губам. Можеби дел од нив вратив на изборите потоа, затоа што сфатија луѓето дека тоа е иднината. Тоа и е иднината на нашата земја. И од неа не смееме да се откажеме. На овие избори, ќе победат тие што веруваат токму во тој дух. И други ќе се обидат, на „мала врата“ да го вратат национализмот, па дури и радикализмот, го чувствувам како се појавува. Од ВМРО-ДПМНЕ нема дилема, тоа е така, видливо е. Но немојте другите партии да се обидуваат во тој дух. Сите тие ќе изгубат на крајот како партии и само ќе ни направат едно големо добро“, вели Заев.
Тој додава дека не се откажува од тој концепт, и дека ако треба и партнерите во сопствената коалиција со тој концепт ќе ги победи.
„Заради тоа што, знаат сите, тоа е иднината! Кога ја прават математиката, гледам колку се алчни да зграбат гласови, но се лажат. Тоа е краткорочно, нема да им донесе ништо добро, ќе изгубат на крајот на денот. Ние остануваме на концептот „Едно општество за сите“, нашата понуда ќе биде еднаква. За мене, за нас, граѓанинот е центарот на светот и вниманието! Ќе се понудиме пред секој, на секоја врата ќе тропнеме да го привлечеме граѓанинот да остане како што велиме на „right track“, на вистинскиот пат, затоа што друг пат за оваа наша мултиетничка земја, нема“, посочува премиерот во интервјуто.