Шведската агенција за јавно здравје денес требаше да објави извештај за проценетиот број на инфицирани со коронавирус во Стокхолм, но презентацијата била откажана, јавуваат шведските медиуми.
Главниот епидемиолог Андерс Тегнел изјавил дека имало „сериозни грешки“ во моделот, врз кој е направен извештајот и морал да се повлече.
„Откривме грешки во извештајот и авторите на извештајот во моментов поминуваат низ материјалот и го разгледуваат. Ќе го објавиме извештајот веднаш штом ќе се заврши“, напиша Агенцијата за јавно здравје денес на Твитер.
„Со таквите модели е тешко да се работи, произлезе дека погрешна варијабла (променлива) е внесена уште на самиот почеток. Потоа, втората променлива беше изменета за да се достигне целната вредност. Поради тоа, резултатот беше огромна бројка. Грешката требаше да ја забележиме веднаш“, изјави Тегнел.