Американската амбасадорка во земјава, Анџела Агелер, на церемонијата на годишнината од независноста на САД што се одржа во Скопје, зборуваше за демократијата и изборите што годинава се одржуваат во над 90 земји.
Таа истакнала дека најсилните демократии се прават со обединување, при што додала дека САД се посилни затоа што имаат пријатели и сојузници како Северна Македонија.
„Генерално, изборите се базираат на различни мислења, приоритети и индивидуални цели. Можеби се тешки, но кога ќе завршат, императив е да се вратиме на она што нашиот претседател Абрахам Линколн го нарече „подобрите ангели на нашата природа“. Повторно да се обединиме како народ и да работиме за доброто на граѓаните. Ова важи овде како што ќе се применува во САД во ноември. Затоа, ви честитам вам и на вашата влада што го правите ова.
Околу нас гледаме свет кој се менува. Повеќе гласачи од кога било имаат право да гласаат во 2024 година во над 90 земји и во ЕУ, дури и во време на војна. Сега се потсетив дека најсилните демократии не успеваат сами. Кога сме обединети сме посилни. САД се посилни и поблагородни затоа што имаме сојузници, пријатели и партнери како Северна Македонија. Господ нека ги благослови САД и Северна Македонија“, кажала меѓу другото Агелер во обраќањето пред присутните на церемонијата која се одржа во Амбасадата на САД во Скопје.
Со огномет во присуство на партнери и пријатели беше одбележан 4-ти јули.