Не сум од кампусот на скептици, туку секогаш ќе останам оптимист без да се крене белото знаме. Поминавме низ многу соочувања и потешкотии и постигнавме успешно да ги завршиме Поглавјата кои се важни за државата и за стабилноста, рече лидерот на ДУИ, Али Ахмети на денешниот дебатен панел со наслов „Европски фронт“, по повод 21 година од формирањето на Демократската унија за интеграција како партија.
Ахмети изјави и дека „ниту најголемите оптимисти не мислеле дека земјава некогаш ќе биде членка на НАТО“.
-Тие ниту помислиле дека Македонија како држава може да биде пример за решавање на проблемите и прашањата. Македонија е мала Европа која почитува различности. Ако некогаш сме мислеле дека и 10 години ни требаат за членство во ЕУ, јас би рекол дека ние за 3-4 години ќе биделе дел од големото европско семејство бидејќи геополитичките и геостратешките околности се сменија во полза да се забрза и скрати процесот, рече Ахмети од хотелот „Александар Палас“, каде што се одржува панелот.
Сепак претседателот на ДУИ е дециден дека мора да дојде до помирување меѓу сите субјекти во државата, за да се спроведат уставните измени.
-Може да се постигне помирување и да се стават пред себе интересите на државата и иднината на генерациите. Тоа се историски и одлучувачки моменти, а настрана да бидат дневните политички интереси. Да не биде приоритет дали ќе ги добиеме наредните избори, туку приоритет да биде дали ќе ја постигнеме најголемата услуга за нашите граѓани со членството во ЕУ, рече меѓу другото Ахмети.