Компанијата airBaltic објави дека од следната летна сезона ќе отвори линии од Рига (RIX) до Љубљана (LJU), Скопје (SKP) и Приштина (PRN).
На 2 мај, летонската национална авиокомпанија ќе ги изврши своите инаугуративни летови до главните градови на Словенија и Северна Македонија, додека сообраќајот меѓу Рига и Приштина ќе започне два дена подоцна.
Предвидени се две неделни поаѓања на сите нови линии.
Покрај Љубљана, Скопје и Приштина, airBaltic во својата мрежа ќе додаде уште три дестинации во овој дел на Европа. Следната пролет директна врска со Рига ќе имаат и Тирана (TIA), Софија (SOF) и Кишињев (KIV).
„Кога се подготвуваме за следната сезона, секогаш внимателно ја проценуваме состојбата на пазарот и побарувачката на патници. Овој пат видовме можност да ја прошириме нашата мрежа во Централна и Југоисточна Европа со поврзување со балтичките и скандинавските земји…“, изјави извршниот директор на airBaltic, Мартин Гаус.
Компанијата ќе врши летови до нови дестинации со Airbus A220-300s, кои можат да превезуваат 145 патници во патничка кабина во две класи.