Албанскиот Парламент, на денешната пленарна седница, што ја почна со едноминутно молчење во знак на почит на загинатите македонски патници во автобуската несреќа во Бугарија, го ратификува договорот за заеднички контроли на граничните премини меѓу Македонија и Албанија.
Албанија и Македонија ќе имаат заеднички гранични контроли по истиот модел што го имаме со Косово и Црна Гора, рече министерот за внатрешни работи Бледи Чучи во своето обраќање во Собранието.
Тој додаде дека на сите шест гранични премини ќе има само еден контролен шалтер.
-Договорот се заснова на модели што ги имаме со другите земји кои ги подготвивме во консултација со мисијата ПАМЕКА во нашата земја. Главните цели се да се олесни движењето на луѓе и стока, да се зголеми соработката во исполнувањето на заедничките безбедносни интереси и брзата размена на информации, да се зајакне професионалниот капацитет на службениците на граничната полиција и да се контролира квалитетот на спроведувањето на законот за граничната контрола, рече Чучи.
Долж македонско албанската граница функционираат граничните премини Блато и Џепиште (кој е од локален карактер и веќе функционира заедничка контрола) кај Дебар, Ќафасан кај Струга, Стење кај Ресен и Свети Наум кај Охрид.