Фудбалерот на Барселона, Дани Алвес вечерва потврди дека ќе го напушти клубот, само седум месеци по враќањето на „Камп Ноу“.
Алвеш се врати во Барселона како слободен играч во ноември и оттогаш одигра 16 натпревари, постигна гол и имаше три асистенции.
„Би сакал да им се заблагодарам на сите за можноста што ми ја дадоа да се вратам во овој клуб и што можев повторно да го носам овој прекрасен дрес. Не знаете колку сум среќен. Се завршува еден многу убав циклус и се отвора друг, попредизвикувачки“, наведе Алвес на социјалните мрежи.
Тоа беше негов втор мандат во каталонскиот клуб за кој претходно настапуваше од 2008 до 2016 година. Одигра вкупно 407 натпревари и меѓу другото освои шест шампионски титули во Примера и три ЛШ.
Со Барселона освои вкупно 23 трофеи. Тој е најтрофејниот фудбалер со 46 трофеи на сениорско ниво, а вкупно 47.
Во текот на кариерата играше и за Баија, Севиља, Јувентус, Пари Сен Жермен и Сао Паоло.
За репрезентацијата на Бразил досега одигра 124 натпревари и постигна осум гола.