Премиерот Христијан Мицкоски денеска информира дека според стратешкиот дијалог меѓу Македонија и САД, ќе се промовира инвестиција во производен објект како рудата антимон, која што ќе се експлоатира во близина на кривопаланечкото село Луке. Тоа е редок минерал и, како што вели премиерот, ќе може да значи многу за нашата економија.
-Истрагите таму се веќе при крај и очекувам тоа многу скоро да биде започнато. Ќе се извезува во САД. Од инвеститорите ја добив информацијата дека топилницата ќе се гради во Оклахома, САД. Тоа е заокружен циклус и важно за Македонија како држава и нас како граѓани. Очекувам плоден ден во САД, рече премиерот за состанокот во САД.
Антимонот е релативно ретка минерална суровина, која има значајна улога во современата индустрија, особено во производството на батерии, огноотпорни материјали и легури. Побарувачката за антимон во светот силно расте последниве години, делумно поради неговата примена во енергетиката и електрониката, што го прави стратешки важен ресурс на глобално ниво.
Македонската делегација во Америка ја предводи шефот на дипломатијата, Тимчо Муцунски, а ќе учествуваат и министрите за внатрешни, одбрана, дигитална трансформација и енергетика.
Домаќин ќе биде заменик-државниот секретар на САД, Кристофер Лендау. Детали сè уште не се откриваат, но ќе се разговара за соработка во повеќе области. Фокусот ќе биде кон политичка и безбедносна соработка.
Се очекува македонската делегација да го покрене и прашањето за враќање на иселеничките визи, кои САД ги замрзна во јануари годинава, но и да се обиде да го вметне и прашањето за целосно повлекување на визите за македонските граѓани.