Русија сигнализирала дека е подготвена да го прифати влезот на Украина во Европската Унија како дел од евентуален мировен договор за прекин на војната во Украина, велат американски претставници, истакнувајќи дека веќе е постигнат консензус за околу 90 проценти од мировниот план што го составија САД, објави АП.
Напредокот е постигнат за време на интензивните разговори во Берлин меѓу претставниците на американскиот претседател Доналд Трамп, Стив Виткоф и Џаред Кушнер, и украинскиот претседател Володимир Зеленски и неговиот тим, со учество на високи европски претставници.
Разговорите се фокусираа на безбедносните гаранции за Украина, кои Киев ги смета за клучни за одвраќање на идната руска агресија, како и на спорното прашање за барањето на Русија – Украина да отстапи територија во источниот регион Донбас.
Американските преговарачи ѝ кажале на украинската страна дека повлекувањето на нивните сили од источниот дел на регионот Донецк мора да биде дел од секој договор за прекин на речиси четиригодишната војна, изјавил извор запознаен со разговорите.
Истиот извор, кој зборувал под услов на анонимност по вториот ден од разговорите меѓу американската и украинската делегација во Берлин, рекол дека Киев побарал продолжување на разговорите.
Друг извор, исто така запознаен со преговорите, забележал дека остануваат сериозни несогласувања околу територијалните прашања.