Тренерот на Реал Мадрид, Карло Анчелоти (64) стана првиот тренер кој раководел на 200 натпревари во Лигата на шампионите. Италијанскиот стручњак испиша историја во европското натпреварување во фантастичниот четвртфинален натпревар помеѓу Реал Мадрид и Манчестер Сити (3:3). Рекордот го достигна во 21 сезона и со осум екипи: Парма (6), Јувентус (10), Милан (73), Челси (18), ПСЖ (10), Баерн (12), Наполи (12) и Реал Мадрид ( 59). Притоа оствари 114 победи, 45 нерешени и 41 пораз.
„Тоа е големо достигнување. Се сеќавам на мојот прв натпревар, тоа беше против Спарта Прага кога бев во Парма. Да се достигне 200 натпревари значи многу. Достигнување е да се преживее толку многу години во фудбалот, особено на моја возраст“, рече Анчелоти.
Тој е и тренер со најмногу титули во Лигата на шампионите (четири) и победи (114). Тој освои две европски титули на клупата на Реал (2014, 2022), и две на клупата на Милан (2003, 2007). Тој е исто така првиот и единствениот што предводел тимови до пет финалиња во Лигата на шампионите.
Како играч, тој двапати го освои Купот/Лигата на шампионите со Милан (1989, 1990), со што стана еден од седумте што го освоија Купот/Лигата на шампионите и како играч и како тренер. Анчелоти е и единствениот тренер кој некогаш ја освоил шампионската титула во сите пет врвни европски лиги (Милан, Челси, ПСЖ, Баерн, Реал Мадрид).
Зад него по бројот на натпревари во Лигата на шампионите е Алекс Фергусон со 190 меча, а потоа следуваат Арсен Венгер (178), Пеп Гвардиола (168), Жозе Мурињо (145), Мирчеа Луческу (115), Диего Симеоне (101), Јирген Клоп (100), Масимилијано Алегри (100)…