Тренерот на Реал Мадрид, Карло Анчелоти најави дека клубот нема да прави повеќе трансфери ова лето. „Белите“ ги привлекоа Килијан Мбапе и Ендрик. Тие беа во игра и за Лени Јоро, а се очекуваше дефанзивецот да се одлучи за шпанскиот гигант кој планираше да го ангажира следното лето. Сепак, талентот заврши во Манчестер Јунајтед.
Анчелоти објасни дека Реал нема да привлече централен дефанзивец, туку ќе се потпира на младите: „Составот е јасен. Ваљехо се врати, Алаба се опоравува. Ги имаме јуниорите Жоан Мартинез, Јакобо Рамон и Раул Асенсио. Нема да има заминувања затоа што сите сакаат да останат“.
Вечерва Реал Мадрид ќе го одигра првиот натпревар од американската турнеја, кој е против Милан во Чикаго. Анчелоти прокоментира како напредуваат подготовките. „Малку по малку почнуваме да ги гледаме играчите. До овој момент работевме добро и ги оценувавме помладите од школата. Сите што ќе пристигнат се во добра форма“.
„Вистината е дека не сум загрижен бидејќи имаме извонреден состав и тоа важи за сите позиции. Мбапе се приклучи што е фантастично. Немаме многу време да се подготвиме за првите натпревари, но играчите ќе дојдат во добра форма. Имаат програма која започнува 15 дена пред нивното пристигнување. Најважен е одморот. Целата група ќе биде на линија на седми“, објасни Италијанецот.
Стручњакот призна дека на тимот ќе му недостига Тони Крос, но додаде дека има начин да го замени Германецот.
„Ни недостига Крос, но имаме можности да го замениме. Немаме играч како него бидејќи имаше големи квалитети, но ние имаме многу. Каде ќе игра Белингем? Колку поблиску до шеснаесетникот, толку подобро. Ги имаме Модриќ, Чуамени, Валверде“.