Арсенал повторно остана без трофеј на крајот од сезоната. Притисокот врз „топџиите“ расте, а Микел Артета веќе откри дека тие мора да освојат голем трофеј следната година. За да го направат ова, тие треба да ги пополнат сите празнини што се создадоа оваа натпреварувачка сезона, од кои првата е позицијата централен напаѓач.
Клубот од Северен Лондон има среќа што има трансфер пазар полн со млади и талентирани напаѓачи, а раководството го насочи вниманието кон главната цел – Виктор Ѓекереш. Шведскиот фудбалер со унгарски корени имаше неверојатна сезона во која речиси стана првиот играч по 23 години што ја освоил „Златната копачка“ надвор од „петте најдобри лиги“.
Тој го предводеше Спортинг до двојна круна и нокаут фазата од Лигата на шампионите, а неговите 54 гола на 52 натпревари не останаа незабележани. Според португалските медиуми, луѓето на Арсенал неодамна отпатувале во Лисабон за да се сретнат со неговиот агент Хасан Четинкаја. Англискиот клуб започна преговори со понуда од 70 милиони евра обештетување, со бонус за потпишување што би се искачил на 12 милиони. Фиксната плата на Швеѓанецот би била околу седум милиони, со дополнителни бонуси поврзани со неговите перформанси на теренот.
Неговиот агент изјави во текот на сезоната дека Ѓекерш нема да менува средина за помалку од 100 милиони, што може да биде вистина само ако други тимови се приклучат во трката. Пристигнувањето на Швеѓанецот во Премиер лигата е неизбежно, а има и други клубови кои би биле заинтересирани за неговите услуги. На Ливерпул секогаш му е добредојден напаѓач, Челси сака прво да плати, а потоа да размисли што да прави со играчот, додека Манчестер Јунајтед го има човекот на клупата кој го претвори во ѕвезда.
Свесни колку лесно оваа ситуација може да излезе од контрола, Арсенал реши прв да ги стави своите карти на маса. „Топџиите“ се на еден извонреден напаѓач и малку среќа одалечени од големите титули што ги посакуваат, па затоа нивната подготовка за следната сезона би била многу полесна доколку го обезбедат 26-годишникот на почетокот на преодниот рок.